O Programa de Inclusión Social ESPAZO ACOLLE configúrase como un espazo de atención, coidado e activación e defensa de dereitos, dirixido especificamente a persoas migrantes en situación ou risco de exclusión social na Coruña e a súa comarca, un territorio marcado por unha elevada taxa de pobreza severa, precariedade administrativa, dificultades de acceso ao emprego, vivenda e saúde, e múltiples barreiras lingüísticas, culturais e institucionais que afectan especialmente a mulleres migrantes, persoas sen rede de apoio e persoas en situación administrativa irregular.

As actuacións parten dunha concepción integral da inclusión social, que vai máis alá da cobertura de necesidades materiais para incidir no acceso efectivo aos dereitos fundamentais, a autonomía persoal e a participación social. A intervención articúlase desde unha perspectiva feminista, interseccional, ecosocial e comunitaria, co obxectivo de garantir a autonomía, o empoderamento colectivo e a participación plena das persoas migrantes, recoñecendo as múltiples discriminacións ás que se enfrontan.

ESPAZO ACOLLE desenvolve un programa integral e personalizado de inclusión, orientado a responder de maneira efectiva ás múltiples dimensións da exclusión social que afectan ás persoas migrantes, como a irregularidade administrativa, a falta de recoñecemento de cualificacións, a xenofobia institucional ou a ausencia de redes familiares.